Ilubong ko Ikaw sa Kalimot

Usa ka panultihon diin daw nagbangutan ang usa ka tawo, ngadto sa adunay dagkong salaod nga nabuhat dinhi kanato.
Sa pagpakabuhi nato niining ibabaw sa yuta, dili mamahimong sadya ang atong kaugalingon ingon man ang atong kasing-kasing kung dili kita makiglambigit sa gugma, gugma sa atong pagtuo sa Diyos, gugma sa pamilya, sa silingan, ug paghigugma sa usa ka binuhat nga sa imong tan-aw mao ang imong makauban ngadto sa altar sa kaminyuon.
Sagad sa mga kabatan-onan, adunay pipila nga sayo ang pakiglambigit sa gugma ngadto sa usa ka binuhat, sa laktod sayo nga nagminyo. Sa dihang mohangyo na nga manguyab, arang kadaghan sa mga pasalig ug mga pagpatuo aron sa ingon siya sugton. Pipila lamang kini ka senaryo nga gisugilon kanako sa akong suod nga higala diin sa pagkakaron hilabihang pagmahay sa kaugalingon nganong nabuhat niya ang pagtuo dayon sa gipangsulti kaniya.
Pwera sa pipila nga tinud-anay ang paghigugma ngadto sa usa ka babaye, paghigugma nga bisan unsang unos ang moabot dili gayod magbulag. Sa sinto porsinto nga pasalig hayahay lamang og adunay napulo nga matuman. Ang akong higala sayong nisulod sa kalibutan sa kaminyuon, og nasugamak sa lalaki nga hawod mo dula sa mga pagbinuang sa panag-ipon, kanang giingon “playboy”, himabaye ug labaw sa tanan “bakakon”.
Sa ilang panag-ipon wala pa’y duha ka bulan gibiyaan na siya sa lalaki nga daw sama sa nagbiya og kinan-an sa karinderya human nga nabusog na siya. Wala gayo’y puangod nga mibiya human naangkon ang lawasnong katagbawan.
Sa pagkakaron, gihimugso sa akong higala ang iyang anak. Sulod sa mga pag-antos, kasub-anan ug pagmahay wala siya nawad-an sa paglaum ug pang huna huna nga iya kining ipakuha sa iyang tago-angkan sa dihang nagsabak pa. Sagad sa ingon ani nga sitwasyon ila na lamang ipakuha, apan dako ang iyang pagtuo sa Diyos, nga kun buhaton niya kini aduna siya’y dakong tulobagon ugma damlag kung ang tawo mamatay.
Kung usa kaman sa mga inahan diin sama sa ingon ang nadangatan, ayaw pawala sa paglaom, dili ulahi ang tanan, wa’y nasayod nga kana imong gisabak mao unya kana ang motabang kanimo luyo sa kalisod sa kahimtang.
Kung usa sab ikaw sa mga lalaki nga tampalasan, human ka nihimulos sa lawasnong katagbawan, ayaw palabi Doy, kay wala ka kahibalo basin ang imong kaugalingon anak ra unya ang mosudya kanimo nganong nabuhat mo kini.
Sa mga linghod ang pangidaron, likayi una ang pakiglambigit sa gugma, tiwasa una ang pagtuon, pag-abot sa panahon nga andam kana sa tanang responsibilidad sa pagpuyo, nan nganong pugngan paman ang pakigrelasyon.
Siguradoha usab nga ang tawong imong nagustuhan adunay dakong pagtuo sa atong Diyos. Ingon sila “da practical na kana karon”, apan mahimo ba nga practical ang imong pagmahay?.
Bisan paman kung midawat sa Sakraminto sa Matrimonya sa kaminyuon, kanang gikasal sa simbahang gituohan ug pinaagi sa Sibil diha atubangan sa judge, aduna pa gayo’y magbulag, dili gihapon siguro kana malikayan kung kana ang kapalaran nga gilatid sa dihang kita gihimugso.
Sa pagkakaron si Michelle hilabihang kayod aron mabuhi niya ang iyang anak, wala niya isipa nga siya pinaangkan kay matod niya, Diyos ang nasayod sa tanang pagbalos nga mo alim sa mga kasakit nga iyang nahiagoman sa nanglabay’ng panahon.
Dugang pa, manghinaot siya nga ang lalaking nibungkag sa iyang kaugmaon magmalipayon sa tanang adlaw, aron pag-abot sa panahon sa panudya ug sa kamatayon dawaton niya ang dakong silot nga naghulat.
Ayaw paharia ang batasan sa pagpamakak sa asawa, labaw sa tanan pagpanapaw aron dili kita malubong sa dugay’ng katuigan sa kalimot sa atong mga anak, asawa, banay ug kahigalaan.
(Kung kinsa kadtong buot mopaambit sa ilang mga ngit-ngit nga kasinatian sa kinabuhi, mamahimo ninyong ipadala kanako pinaagi sa e-mail jeepycompio@yahoo.com ingon man sa 09104227400.)